There were nine and nine nobles
Rode roon Banchory fair,
And bonnie Glenlogie,
Wis the pride o’ them there;
There were sax and sax maidens
Dined in the King‘s ha,
Bonnie Jeannie o Bethelnie
Wis the ooer o them aa

Doun cam Jeannie Meldrum,
She cam trippin dounstair,
And she‘s chosen Glenlogie
Among aa that were there;
She called on his fitboy,
Who walked by his side,
Spierin, “Fa is that young man,
An’ far dis he bide?“

“He‘s titled Glenlogie
Fan he is at hame,
He‘s o‘ the noble Gordon‘s,
Lord John is his name”
“Glenlogie, Glenlogie,
Prove constant and kind,
My love is laid on ye,
An’ yer aye on my mind”

He’s turned aboot lichtly,
As the Gordon‘s dee aa,
Sayin’ “Thank you, Jeanie Meldrum,
Bit I‘m promised awa.”
She called on her handmaids
Tae mak her a bed,
Wi ribbons aye an napkins
To tie up her head

“Lay me doun gently
Wi ma face tae the wa,
Tak the rings fae ma ngers,
My jewels an aa”
Noo up spak her faither,
An a wae man wis he,
“I‘ll wed ye tae Dumfendrum,
He‘s mair gowd than he”

“Oh na, na dear faither,
Oh that winna dee,
If I canna get Glenlogie,
Then for him I will dee”
Her faither‘s ain chaplain,
A man o great skill,
He’s wrote a braid letter,
An indited it weel

“Glenlogie, Glenlogie,
Oh must it be so,
She’s lain her love on ye,
Must she die in her woe?“
Fin Glenlogie got the letter,
Well a licht lauch gart he
Bit fan he read the letter,
Well a tear blinned his ee

Saddle the black horse,
Saddle the broun
Bonnie Jean o Bethelnie
Will be dead e‘er I win
Fin he got tae Bethelnie,
There wis nithin there,
But weepin aye an wailin,
Vexation an care

Oh pale and wan was she
When Glenlogie cam in,
But reid and rosy grew she
Fin she kent it wis him
“Turn roun Jeannie Meldrum,
Turn tae your richt side,
I‘ll be the bridegroom,
If ye‘ll be the bride”

Noo Jeannie‘s got mairrit
An her tocher doun tauld,
Bonnie Jean o Bethelnie
Wis saxteen year auld Bethelnie, Bethelnie,
Ye shine whar ye stan,
And the heather bells aa roun ye
Shine on Fyvie‘s land